SEKOMS Apoia Ekipamentus Ba Radio Komunidades

Sekretariu Estadu ba Komunikasaun Sosial (SEKOMS) fahe ekipamentus ba Radio Komunidade 14 ne’ebe kobre iha rai laran, hodi troka fali ekipamentus tuan ne’ebe durante ne’e la funsiona ho diak.

Diretor Nasional Sentru Radio Komunidade(CRC), Luis Evaristo Soares, hafoin entrega ekipamentu ba Jestor Radio Komunidade sira, hateten  SEKOMS liu husi CRC nia kna’ar bo’ot mak fo asistensia teknika ba radio komunidade sira.

“Durante tempu naruk ita servisu hamutuk identifika ona, katak funsionamentu komponentu ekipamentu radio sira iha distritu la dun funsiona,” Diretor Soares hateten, hafoin entrega ekipamentus, iha Hotel Vilaverde, Dili.

Nia espera katak, ho ekipamentus foun beleona  responde ba problema ne’ebe mak durante ne’e radio komunidade sira hasoru.

“Esperiensia ida ne’e mak iha tinan rua tolu liuba kotuk ami iha ona dadus kompletu oinsa mak atu rejolve preokupasaun sira ne’e,”Luis esplika.

Nia esplika durante ekipa tekniku sira sempre preokupa ho viajen ne’ebe mak barak hodi halo atendimentu ba Radio Komunidade iha Distritu sira hodi hadia’a ekipamentu sira ne’ebe mak ladun lao ho diak.

Nia esplika ,iha 2013 nia laran halo ona aquijasaun ba ekipamentu tekniku radio komunidade sira hotu.

“Ida ne’e kna’ar ne’ebe mak ami halo atu responde ba ita bo’ot sira nia situasaun atu oinsa ita bo’ot sira servisu ho kondisaun ne’ebe dignu atu desimina informasaun ba komunidade sira iha ita bo’ot sira nia distritu rasik,”nia hato’o.

Hafoin entrega ekipamentu ,Diretur CRC ne’e mos husu ba Konselho Radio Komunidade hamutuk ho jestor radio sira oinsa atu asegura ekipamentu foun ne’e.

Iha fatin hanesan Pedro de A.Goncalves, Radio Komunidade Ermera iha nia intervensaun hato’o, katak radio komunidade sira iha kapasidade atu halo transmisaun direita ba eventu importante sira, maibe ekipamentu menus.

“Durante ne’e ami impresta deit polisia distrital sira nia ekipamentus halo transmisaun direita,” nia dehan.

“Tanba ne’e mak ho fasilidades ida ne’e ami garante katak ami sei halo transmisaun direta mos ba loron importante sira,”Goncalves dehan.

Iha sorin seluk Manuel de Fatima, tekniku Diresaun Nasional SEKOMS, hateten entrega ekipamentus ba Radio Komunidade sira, balun simu la hanesan ho sira seluk, depende ba nesesidades ne’ebe sira iha.

“Ami hare prioridade, sira ne’ebe presiza liu,” nia hateten.

Nia hateten, ekipa tekniku sira prontu atu ajuda radio komunidade sira wainhira iha failansu tekniku ruma ne’ebe mak radio infrenta presiza atu ajuda.

Ekipamentu ne’ebe mak SEKOM liu husi CRC apoiu ba Radio Komunidade sira mak hanesan,FMTX,RXRNL PTRL,Relay,Mixer,Power Limiter, Cable RF + Conector no mos ekipamentu ki’ik sira seluk ne’ebe uja ba studio ninian mak Sony ICD Recorder,Microphone AKG +Shure ho Modem Speed up 3G Internet no seluk tan.

Estasaun radio komunidade ne’ebe mak sai tarjetu atu reinstalasaun fali ekipamentu foun ne’e, mak Radio Sub-distritu Maubise ho Radio Komunidade Bucoli iha distritu Baucau.

Radio Komunidade ne’ebe horas ne’e dadauk ejiste iha Distritu 12 ne’e mak hanesan Radio Komunidade Rai Husar ,Distritu Aileu,Radio Komunidade Lian Tatamailau, Ainaro,Radiu Komunidade Lian Matebian(Baucau),Radio Komunidade Bucoli, Baucau,Radio Komunidade Kafe( Ermera),Radio Komunidade Tokodede( Liquisa),Radio Komunidade Iliwai( Manatuto)Radio Komunidade Mauloko (Maubise) ,Radio Komunidade(Lospalos),Radio Komunidade (Maliana),Radio Komunidade Atoni Lifau (Oecuse),Radio Komunidade Lian 1912 (Same),Radio Komunidade Cova Taroman( Suai) no Radio Komunidade Povu Viqueque.

Nia dehan, radio komunitaria nia ezistensia iha komunidades forte tebes, liu-liu iha area remotas ne’ebe labele asesu ba televizaun, radio nasional inklui jornais sira.

Fonte Notísia : https://thediliweekly.com/2014/02/27/sekoms-apoia-ekipamentus-ba-radio-komunidades/